2017-02-24

MULTIPLO ETA ZATITZAILEAK

Oraingoan multiplo  eta zatitzaile kontzeptuari sarrera posible bat nola eman azalduko dizuet.
Nik oraingoan erregletak erabili ditut eta lehen hezkuntzako 4. mailan dabilen nire seme Markelez baliatuz, multiploak azaltzen saiatu naiz.
Erregletak aurretik ezagutzen zituen, ezinbestekoa!!bestela ez du kontzeptua ondo ulertuko.
Ez dut uste 6. mailara itxaron behar denik kontzeptuari sarrera emateko, edozein momentu da ona, baita ere haur hezkuntzan.
Horrela D.B.H ra heltzen direnean ez dute arazorik izango mota honetako ariketak ebazten,

Bi soka dauzkat, bat 2.7 dm takoa eta bestea 12 cm takoa. Zatiak egin nahi ditut eta zati denak berdin neurtu behar dute. Zenbatekoak izan behar dira zatiak sokarik ez sobratzeko? Zenbat zatitan banatu beharko dugu 2.7 dm ko soka eta 12 cm takoa???? 

Badakigu, erregletak laranjak 10 cm neurtzen dituela beraz 2.7 dm ko soka egiteko bi erregleta laranja eta erregleta beltza beharko ditugu. Aldiz, 12 cm egiteko, erregleta laranja eta gorria.
Azpiko irudian agertzen da problema ebazteko bidea


Esan dizuedan bezala, bideo bat ipiniko dut multiplo eta m.k.t ren kontzeptuari sarrera emateko nire semeaz landu dudan bidea.
Orain errepikapena falta da, behin da berriz zenbakiak aztertzea, multiplo eta zatitzaile kontzeptuak bereganatu arte.



2017-02-10

UEUko udaberriko ikastaroak



Eskerrak eman behar dizkiot UEUri beraien udaberriko ikastaroetan parte hartzera gonbidatu didatelako.
Aspalditik nabil erregleten inguruko ikastaro bat emateko gogoaz, oso material borobila da, kantitatea landu daiteke, ordenazioa, eragiketak, zatigarritasuna, probabilitatea, logaritmoak, ekuazioak....
Interesa daukazuenok, badakizue, izena eman eta elkarrekin murgilduko gara erregleten munduan.
UEUkoek egin zidaten elkarrizketaren lotura jartzen dizuet.

http://www.unibertsitatea.net/blogak/ueu365/2017/02/09/lorena-egidazu-ormazabalzenbakiak-asmakizuna-dira-kantitatea-aldiz-egunerokotasunean-sentitu-eta-ukitzen-duguna/



2017-01-09

MONTESSORIREN TXARTELAK


Uste dut beste sarreraren baten txartel hauei buruz hitz egin dudala eta horrela ez bada bazen ordua.
Nik gauza askotarako erabiltzen ditut eta horren adierazle jarraian jarriko dudan bideoa da.


2017-01-04

KUTXAZAINA

Aurten, Olentzerok, ondo portatu naizelako, "HAURREN HIRIA" liburua oparitu dit. Liburu hau Francesco Tonucci Psikologo eta ikerlari italiarrak idatzi du.





Bizitzaren lehen urteetan ez dago irakaslerik, ez da material didaktikorik erabiltzen, ez da programarik jarraitzen. Beraz, zeri eman diezaiokegu horren garrantzitsua den hazkundearen meritua? Lehen urte hauetako jarduera esanguratsuenari ematea beste aukerarik gelditzen ez zaigula iruditzen zait, hau da, jolasari.

Horrelako esaldi potoloz eta mamitsuz beteta dago liburua. Hausnarketara bultzatzen gaituen esaldiz beteta.

Jolas mota asko daude: librea( behar bada interesgarriena), estrukturatua, gidatua, bakarkakoa, taldekoa...
Nik oraingoan, jolas gidatua eta taldekoa proposatzen dizuet, sistema hamartarra lantzeko, KUTXAZAINA.


HELBURUAK:
Sistema hamartarra ulertzea taldeak egin eta desegiten, hau da, hamarrekoetatik unitateetara pasatuz eta alderantziz.
Batuketa eta kenketen algoritmoak ulertzea.

MATERIALA:
Talde bakoitzarentzat bi dado eta 40 fitxa urdin eta 40 fitxa gorri.

Hasieran arauak arbelean idaztea komeni da. Beti bezala, koloreak zuek aukeratzen dituzue, erabiltzen duzuen editorialaren arabera unitateen eta hamarrekoen koloreak nik proposatzen ditudanen desberdinak izan daitezke.
         Fitxa urdinak bat balioko du, UNITATEA
         Fitxa gorriak hamar urdinen balioa dauka, HAMARREKOA
         Hamar urdin ditugunean, gorri bategatik aldatu behar da.
Talde bakoitzean, kutxazain bat izango da, fitxa guztietaz arduratuko dena.
Partaide bakoitzak, turnoa errespetatuz, bi dadoak batera botako ditu eta batuketa egin, hau da, dado baten 5 eta bestean 6 irteten bada, kutxazainak 11 fitxa urdin emango dizkio. Fitxa urdinekin, hamarreko talde bat eginda dauka eta kasu horretan kutxazainari eskatu behar dio 10 urdin gorri bategatik aldatzea. Segidan ez badu egiten, kutxazainak 10 fitxa urdin horiek kenduko dizkio.
Horrela taldeko partaide guztiak arituko dira eta 9 fitxa gorri lehenak lortzen irabaziko du partida.
Garrantzitsua da, beti esaten dudan bezala, bokabularioa lantzea, beraz, UNITATE eta HAMARREKOAz arituko gara. Jolasa egiten dugun lehen aldian ez daukagu bokabulario aldaketa egin beharrik baina bai hurrengotan.

Beste aukera bat kentzea izango zen. Partaide bakoitzak dado bat hartzen du eta adibidez, 5 fitxa urdin eta 5 gorri.
Dadoa bota eta irteten den kantitatea kutxazainari eman behar dio. Momentu baten ez baditu fitxa urdin gehiago aldatu egin beharko du, kenketa eramanekin egiten den bezala.
Fitxa guztiak galtzen duen lehenak irabazten du.

Hurrengo baten bideo bat grabatuko dut jolas batzuekin eta eskegiko dut, ikusiz errazago ulertzen dela uste dut eta.


2016-12-01

PROBLEMAK LEGOKO PIEZEKIN


Aurten ematen hari naizen garatuan, gai berri bat sartu dut: PROBLEMAK
Nik uste dut, problemak hasieratik landu behar direla eta forma askotara, hori bai, beti al denean behintzat manipulatuz.
Urteekin ikasi dut, problemak ebazterako orduan, imajinazioak garrantzi handia daukala.Gaur egungo umeek ez dute beraien buruan irakurtzen dutena irudikatzen. Horregatik, uste dut, beraien munduko problemak irakurtzean, identifikatu eta soluzioa errazago topatuko zutela.
Oraingoan bideo bat jartzen dizuet. Bideoan, LEGOKO piezek bokabulario matematikoa nola landu eta ideia batzuk azaltzen ditut.
Ez dugu inoiz ahaztu behar bokabularioa. Hizkuntza berri bat ikasten dugunean bokabularioarekin hasten gara eta matematikak hizkuntza bat da.



2016-11-20

HIRUGARREN SAIOA, BLOKE LOGIKOAK

Bloke logikoak, zer esan hauei buruz:
Gizakion ezaugarri bat, trebetasunak garatzean da. Trebetasun horiek fisikoak edo kognitiboak izan daitezke. Trebetasun hauei esker, ekintza desberdinak egin genitzake eta gure inguruarekin komunikatzeko gai bihurtzen gaitu. Trebetasun hauetako bat PENTSAMENDU LOGIKO MATEMATIKOA da. Logikaren bidez, iritzi edo uste baten  baliotasuna edo faltsukeria aztertzen dugu.
Baina zer da pentsamendu logiko matematikoa?
Egunerokatusean aplikatu genezakeen, trebekuntza multzoa dela esan genezake. Eragiketa sinpleak ebatzi, informazioa aztertu, pentsamendu erreflexiboa erabili eta ingurua aztertu.

Nola lagundu PENTSAMENDU LOGIKO MATEMATIKOARI?
  • Ezaugarri desberdinen sailkapena
  • Bizi izan dutena ahoz esatea
  • Ezaugarriak azaldu
  • Bikoteak egin
  • Sailkatu
  • Konparatu
  • Kantitatea landu

Hau guztia borobiltzen duen materiala DIENES en BLOKE LOGIKOAK da.
"M"rekin askotan erabiltzen ditut eta oraindik zailtasunak ditu lodia-mehea, handia eta txikia pieza batzuetan desberdintzen.
Lehenengo etiketa gabe eta gero etiketak jarriz, jolas desberdinak egin ditugu.
Jolas asko egin daitezke, https://www.youtube.com/watch?v=6H1boh4Abmg
Lotura horretan, bide baten bidez azaldu nituen jolas desberdinak.











2016-11-06

BIGARREN SAIOA: TRASBASEAK ETA 5 ZENBAKIA

Oraingoan bi saio desberdin proposatzen dizkizuet:

Trasbaseak, leku batetik beste batera gauzak pasatzea. Zer lortzen dugu honekin:
  • Begi-eskuen arteko trebetasuna garatzea
  • Koordinazio muskularra
  • Arreta
  • Autonomia
  • Eta kantitateari sarrera egiten diogu, gutxiago eta gehiago kontzeptuak bereganatzeko.



 

5 zenbakiaren deskonposaketa landu dugu. "M" badoa trukatze propietatea bereganatzen. Bi zenbakirekin 5 zenbakia nola lortu asmatu ondoren 1+4 eta 2+3 edo 4+1 eta 3+2, konbinazioa hauek topatu behar zituen.




Sistema hamartarrari be sarrera eman diogu. Berak badaki irakurtzen eta baita idazten 11,12,13,.....20,21......30,31..... 100 baina ez dakit sentsu asko hartzen dion edo kanta bat bezala ikasi duen. Horregatik irudian ikusten dozuen zenbakiak idatzi ditugu, hamabat (zergatik deitzen diogu hamaika?), hamabi, hamahiru, hamalau,...... eta luzeraren arabera ordenatu behar zituen beraz kantitatearen arabera